2017

සැම දුක්ගිනි නිම කරමින් සතුටේ මල් වැසි වසින්න
සැක සංකා දුරුකරමින් විශ්වාසය පතුරුවන්න
භේදභින්න වූ මිනිසුන් සොයුරන් සේ එකතු වෙන්න
අඳුරට ආලෝකය ගෙන නව වසරක් උදා වෙන්න

ජීවිත කතාවක්...

උපන්දා සිට මෙදා වනතුරු පියා කවුදැයි දැක නැතී
වත්ත අද්දර පාසලෙන් මට පාඩමක් කියලා නැතී
අම්ම හැර වෙන නෑසියන් මට ජීවිතේ ඉඳලා නතී
අම්ම කලදේ හැර කුමක් මා කරන්නද කෙලෙසට සිතී

දිවි කැපකළ ඒ මිනිසුන්...

අයුක්තියේ පාලනයෙන් පෙලෙනා දන මුදා ගන්න
මුළා අඳුරෙසිහින දකින දන නින්දෙන් ඇහැරවන්න
සැමට සතුට සපිරුණු ඒ සුන්දර දින බිහිකරන්න
දිවි කැපකළ ඒ මිනිසුන් හදවත් තුළ සදා වෙසෙන

හුදකලාව

පංකා නද මට තනි රකිනා
නෙක සිතිවිලි සිත රජ කරනා
පාඩම් පොත් නැලවිලි ගයනා
කොළඹදි රැය තනිවම ගෙවෙනා

කවුරු ඉන්නෙද ඉතිරිවී...

'නුවණ ඇත්තන්' ඉසුරු සොයලා ඉගිල යනවා රටින් පිටවී
දිවිය වැරදුණු අයද යනවා අතීතය ගැන දුකට පත්වී
රටක් හදනට දිරිය ඇති අය දමා යනවද උරණවී
ඔබත් යනවා මාත් යන්නද කවුරු ඉන්නෙද ඉතිරිවී

පාවෙන වළාකුලෙන් අසමි...

කොළඹින් එන විට උඹ එය ඇහුවද? ඇමතිවරුන් යන වාහන සද්දය
රජරට යනවිට උඹ එය දැක්කද? ජලයත් විෂවී විඳවන කරුමය
උතුරත් දකුණත් හරි හැටි බැළුවද? ජාතිය නාමෙන් රවටන අරුමය
පාවෙනවිට උඹටත් එය දැනුනද? එකම රටක් තුල වෙනසක පුදුමය

සිහිනයට අත්වැලක්...

ඒ පොඩි සිත්වල දිරිය වැඩෙන්නට
සිතේ ඇඳෙන හීනය වෙත යන්නට
හෙට දින බිහිවන ලොව ජයගන්නට
හැකිවෙද උපකාරය ලැබ දෙන්නට

මහනුවර උඩුමුල්ල ගම්මානයේ දරුවන් 29 දෙනෙකුට පොත් සහ පාසල් උපකරන ලබා දීමේ කටයුත්තට සහය වීමට කැමති නම් නාලක දිසානායකට දන්වන්න...

කළාව සහ ශිෂ්ඨාචාරය

මා පරිවර්තනය කල පලමු රචනය.
මෙතැනින්

සමාජ ජාල වෙබ් අඩවි...

එකලදි මටත් වැරදිම විතරයි ඇසුනේ
එනමුත් මටත් එක්වී බලනට සිතුනේ
එෆ්.බී,බ්ලොගර් සමඟින් මා එක්වන්නේ
පහත තිබෙන මතයයි සිත තුළ පිරුනේ

කවිද කතන්දර නිතරම කියවන්නේ
පාළුව දුරලමින් සිත්තොස පුරවන්නේ
දැනුම බෙදා ගැනුමට හොඳ මග වන්නේ
හොඳට හදන දේ වැරදිව ඇයි ගන්නේ

මම?

සොයා බලනෙමි මගේ ගැන මම මෙලොව ඉන්නේ කුම කරන්නද?
විවිධ රසයන එකට මුසුකර අළුත් දේවල් සොයා ගන්නද?
සිතේ හැඟුමන් වදන් කරමින් තවත් කවිපද ලියාලන්නද?
මගේ ගැන මට සොයා ගන්නට තවත් කොපමණ කලක් යාවිද?

අප කාටත් ඇති ප්‍රශ්නයක් මට දැණුන ආකාරය.

ගංවතුර

සොබාදහම උරණව දඬුවම් දෙනවා
වැසි වැඩි වෙමින් ගංගා දිය උතුරනවා
ඒ ගං දියට දිවි පැතුමන් යටවෙනවා
ගං දිය උඩින් මනුසත්කම උතුරනවා

පාලකයිනේ,

වැඩට හෙලනා දාඩියේ නිසි අගය ඉල්ලා
පෙරට ආ ඒ දිරිය මිනිසුන් රුහිරු හොල්ලා
එදානැගිටුම එහෙව් අයුරින් නතර කරලා
මෙදා උඹලම දිනය විකුණා සමරපල්ලා

මිහිකත සුරකින්න...

සංවර්ධනය නාමෙන් වන එළිවෙනවා
දැරිය නොහැකි ලෙස කම්හල් ඉදිවෙනවා
වාතය,ජලය මෙන් පොළවද විෂවෙනවා
ඉවසුම් නොදෙන ලෙස මිහිකත රත්වෙනවා

හැකි සැම විටම තිබෙනා ගස් රැකගන්න
හෙට වෙනුවෙන්ම අලුතෙන් පැළ සිටුවන්න
අපව රකින ගං ඇළ දොළ රැකගන්න
අද මෙන් හෙටත් මේ මිහිකත සුරකින්න

මිහිකත දිනය වෙනුවෙනි...

(අ)සුභවාදී

බාගය නොමැති බව කීමද කළ යුත්තේ?
බාගය තිබෙන බව කීමද කළ යුත්තේ?
බාගය පිරවීම නොවෙදෝ කල යුත්තේ?
මේවට දෙන්න පිළිතුරු මොනවද ඇත්තේ?

කුප්පි ලාම්පුව එලියයි සිතු අයද?
ඒ එලි මදියි යලි අලුතෙන් සිතු අයද?
ලෝකය වෙනස් කලෙ මේ අයගෙන් කවුද?
දන්නා කෙනෙක් මට පහදා කියනවද?

දෙබස

අම්මා-පුතේ එපා නවතන්නට උඹ උ.පෙළින්
         තවදුර යන්න සිදුවෙනවා ඉගෙනීමෙන්

         උගත් කමෙත් ධනයෙත් වෙනසද තිබෙන
         අහසට පොළව සදිසිය උඹ දැනගන්න

දරුවා-කල් ගත නොවනු ඇත මේ ටික දැනගන්න
         අදටත් අපේ අවටින් ඇත දැක ගන්න

         සල්ලි කාරයන් යනවිට ආකාසෙන්
         පාරේ ඉඳන් රැකියා ඉල්ලති උගතුන්...

සිහිනය...

දකින සිහින පැදුරේදිම බොඳ වෙනවා
සියුමැලි දැත් රලු ගල් හා හැප්පෙනවා
එපිට ලොවක් ගැන තවමත් නොපෙනෙනවා
ගල්ගෙඩි අතර දුක විඳිමින් ලත වෙනවා

පාසල් යන්න ආසාවක් සිත තිබෙනා
හීනෙන් පවා දුටුවිට පොඩි සිත දැවෙනා
කොතනද වරද හරි හැටි සිත නොම දන්නා
ලෝකය දිනන අරමුණ මිරිඟුව වෙන්නා

නායක නමින් රජ කරනා ලොකු ඇත්තෝ
උන්ගෙම සතුට වෙනුවෙන් සිටිනා ගැත්තෝ
රටම රවටමින් රඟදෙන මේ ඇත්තෝ
උඹේ සිහින හොරකම් කර අරගත්තෝ

වීරිය අරන් උඹ ටික ටික හිට ගන්න
ලොක්කන් දෙකන් ඇරෙනා ලෙස හඬ දෙන්න
හොරකම් කරපු ඒ හීනය ඉල්ලන්න
සැම වෙනුවෙන්ම සුවිසල් ලොව ජයගන්න

                                                       ඡයාරූපය අන්තර්ජාලයෙනි

නගරයේ රෑ

ඔබ සැම දෙන නිදියන අතරේ
අඳුරෙන් වැසි සුන්දර නගරේ
ගෙවෙනා හැම තත්පර අතරේ
නොසිතන ලෙස අරුමය පැතිරේ

දුම්‍රිය තුළ ලිපි එන අතරේ
තොග බඩු සැළ වෙත එයි නගරේ
මේ හැම සිදුවන විට නගරේ
ජීවිත විකිනෙණවලු අඳුරේ

නොනිදන කඩපෙළ එළි දෙනවා
හොඳ හැටි කෑමද විකිනෙණවා
එක එක රංගන රඟදෙනවා
පැය ටික මේ ලෙස ගතවෙනවා

පිරිතේ නාදය රැව්දෙනවා
ආසිරි පැතුමන් එක්වෙනවා
හෙමිහිට අරුනළු පැතිරෙනවා
නොදකින යාමය නිමවෙනවා

කඳුළ

විද්‍යාවේදි ඇස රැකගත් ද්‍රාවණය
සතුටත් දුකත් ළඟ නිබඳව එකලෙසය
හඬ නොනැඟෙන්න ලොව වෙත දෙන පණිවිඩය
වදනින් කියනු බැරි හඟුමක ප්‍රතිඵලය