සිහින

කළුවර යාමයේ මනසේ දකින්නේ 

පෙනෙනා නෙතේ නෙපෙනෙන සේ ඇඳෙන්නේ

සැලසුම් තිබෙන විට අරමුණ කියන්නේ

සිහින මත වගෙයි ලෝකය දුවන්නේ

ඈත තරුව...

ශීත රැයක ඈත තරුව රුවට දිලෙනවා

එහෙව් තරුව ළඟට ඇදෙන හීන පෙනෙනවා

ශීත මකන සුවය සදන අයුරු හැඟෙනවා

සැබෑවටම එදෙසට යන මඟක් සොයනවා

නව වසරේදී

රෝ බිය දුරලන ලෝකයෙ සටනට අපගේ දිරියද එක්කරමු

වැනසී මියෙනා මිහිකත රැකුමට සැම එක්වී යළි පණ පොවමු

යුක්තිය දිනවන මතුදින වෙනුවෙන් නිවැරදි යුතුකම ඉටුකරමු

මිනිසුන් වෙනුවෙන් මිනිසුන් සිතනා ලොවකට පදනම බිහිකරමු

ශීත බීම...

 වෙහෙසකර දවසක්

සිතට වද දෙන පැනයක්

ශීත බීමත් කවියක්....

(ඡායාරූපය අන්තර්ජාලයෙන්)

මල් කුමරි...

දිවි මරණ දරුණු විශ පොළව තුළ සඟවලා
ඉහළ ඇදි ළතාවක අතු අගේ පීදිලා
යනෙන නෙත් හැමක වගෙ සොඳුරු පැහැ තවරලා
දැනෙන සේ හිනැහුනා මල් කුමරි නියඟලා

මතු දිනේ...

පාන්දර හිරු එළියෙ රන් කිරණ තැවරිලා
සිසිළ දෙන පිණිබිංදු දස අතම විසිරිලා
හරිත පැහැ අතු අගට රතුපාට මුහුවෙලා
මතු දිනේ ගසක් වන මලක් විකසිතවෙලා

මතු දිනේ ගස වෙන්න පොළව ශක්තිය දේවි
අතු දසත පතුරුවා සෙවණ සිසිළස දේවි
තවත් මල් පිපෙන්නට ගසක් වී දිරි දේවි
මහ රුකක් වී එලෙස දිගු කලක් වැජඹේවි

ආසාත්මිකතා සඳහා පරික්ෂා කර ඇත

පරික්ෂා කර තිබුනෙ මුම්බායෙ කීවාද?
නළුවන්ද නිළියන්ද ක්‍රීඩකයො හිටියාද?
නියැදියට ගනු නොහැකි ඒ සුපිරි ජීවිතද?
ඒවාට ගන්නේම නොවටිනා පොඩි උන්ද?

වීරියම ගෙන ගතට කෙසේ හෝ බර අදින
කැළි කසළ ඉවතලා නගරයම හැඩ කරන
ජීවිතය විකුණමින් ජීවිතය ගැටගහන
නියැදි වූවත් තොපට හදවත්ය පණ ගැහෙන 

චේ...

වැළපෙන දනන් වෙත සිනහව ගෙන එන්න
මනුදම් රැකෙන ලෝකය බිහිකරලන්න
යුක්තිය නාමයෙන් දිවියම පුදදුන්න
කෙදිනකවත්ම නොමමියයන සොයුරාන

විභාගයට පෙර

දිරිය ශක්තිය සිතේ දරමින
සෑම සවියෙන් පෙරට ඇදෙමින
ලොවට යුතුකම සිහි තබාගෙන
ඉගිල යනු මැන කරා අරමුණ

අැරඹීමට නියමිත උ.පෙ. විභාගයටත් ඉන්පසු ඇරඹෙන ජීවිතයටත් සාර්ථකව මුහුණ දීමට සුභ පතමි...

වැරදීම...

ඉදිරියේදී ඇහේවි,
"වැරදි බෙහෙතක් විදල මිනිහෙක් මැරුණට ඔච්චර බනිනවා නම්,උන්ට පුළුවන්නෙ වෙදකම් කරගන්න.දොස්තර මහත්තයා මෙච්චර කාලයක් ලෙඩ්ඩු කීයක් ගොඩදාල තියෙනවද?ඒව එකෙක්ට මතක නෑ."
***********************
"අළුත් සිලබස් එක ආවම පරණ එ්වම උගන්නල ළමයි ෆේල් වුනා කියල ටීචර්ට බනින්නෙ,උං කාටවත් උගන්නපු උන්ද?"
***********************
"35කට බඩගියා කියල කඩේට සීල් තියන්න ඕනෙද ? ඔය කරපු උන්ට ඇවිත් උයන්න කියපං"

රගර් රජු....

රටේ නම ලෝකයෙ තියා
කෙළිබිමේ අසිරිය කියා
මනැස් තුල මතකය තියා
රගර් රජු යන්නට ගියා

ශ්‍රී ලංකා රගර් කණ්ඩායමේ හිටපු නායක ෆසීල් මරීජා අද දින(20/05/2017) ජාත්‍යන්තර තරග (සාමාජිකයන් 15) වලින් සමුගැනීම නිමිත්තෙනි.

කළු කුමර කව

  මීට පෙර ලියූ මෝහිනී කවි පන්තියට පිළිතුරකි,

සැන්දෑ එළිය රඹ පාටින් පැතිරෙනවා

සිහිල් සුළං තාලෙට ඇදි ඇදි එනවා

මගේ දෑස ඒ දෑසේ නවතිනවා

නාන තොටේ සිට ඈ නිවසට යනවා

සිත කළඹනා මල් සුවඳකි පැතිරෙන්නේ

නෙක පෙම් වදන් අප අඳුරේ මුමුනනේ

සුන්දර හැඟුම් හදවත් තුළ පූදින්නේ

නිසසළ රැයක අප හැඟුමන් එක්වෙන්නේ

"උඹට ඔහොම ගං කෙල්ලන් හරියන්නෑ"

"ලෝකෙට පෙන්වනා තත්වෙට ගැලපෙන්නෑ"

වැඩිහිටියන්ගෙ ඒ උපදෙස් නවතින්නෑ

සිටුකුමරෙකුගෙ ආදරයද නිදහස් නෑ

ඒ මල් සුවඳ හිත පතුලෙම තදකරලා

ගියමුත් ගඟේ පතුලට මා සැඟවීලා

නාන තොටක් දුටුවම සිත නැවතීලා

තවමත් බලනවා ඒ ඇයමද කියලා

මිනිහෙකුට පුළුවන්ද?

සැම දනන් නිදි අතර අවදියෙන් පසුවෙන්න
අයුක්තිය ඉදිරියේ හඬනගා හිටගන්න
පොදු සතුට ගැන සිතා තම දිවිය දන් දෙන්න
මිනිහෙකුට පුළුවන්ද ඒ තරම් කැපවෙන්න

2017

සැම දුක්ගිනි නිම කරමින් සතුටේ මල් වැසි වසින්න
සැක සංකා දුරුකරමින් විශ්වාසය පතුරුවන්න
භේදභින්න වූ මිනිසුන් සොයුරන් සේ එකතු වෙන්න
අඳුරට ආලෝකය ගෙන නව වසරක් උදා වෙන්න

ජීවිත කතාවක්...

උපන්දා සිට මෙදා වනතුරු පියා කවුදැයි දැක නැතී
වත්ත අද්දර පාසලෙන් මට පාඩමක් කියලා නැතී
අම්ම හැර වෙන නෑසියන් මට ජීවිතේ ඉඳලා නතී
අම්ම කලදේ හැර කුමක් මා කරන්නද කෙලෙසට සිතී

දිවි කැපකළ ඒ මිනිසුන්...

අයුක්තියේ පාලනයෙන් පෙලෙනා දන මුදා ගන්න
මුළා අඳුරෙසිහින දකින දන නින්දෙන් ඇහැරවන්න
සැමට සතුට සපිරුණු ඒ සුන්දර දින බිහිකරන්න
දිවි කැපකළ ඒ මිනිසුන් හදවත් තුළ සදා වෙසෙන

හුදකලාව

පංකා නද මට තනි රකිනා
නෙක සිතිවිලි සිත රජ කරනා
පාඩම් පොත් නැලවිලි ගයනා
කොළඹදි රැය තනිවම ගෙවෙනා

කවුරු ඉන්නෙද ඉතිරිවී...

'නුවණ ඇත්තන්' ඉසුරු සොයලා ඉගිල යනවා රටින් පිටවී
දිවිය වැරදුණු අයද යනවා අතීතය ගැන දුකට පත්වී
රටක් හදනට දිරිය ඇති අය දමා යනවද උරණවී
ඔබත් යනවා මාත් යන්නද කවුරු ඉන්නෙද ඉතිරිවී

පාවෙන වළාකුලෙන් අසමි...

කොළඹින් එන විට උඹ එය ඇහුවද? ඇමතිවරුන් යන වාහන සද්දය
රජරට යනවිට උඹ එය දැක්කද? ජලයත් විෂවී විඳවන කරුමය
උතුරත් දකුණත් හරි හැටි බැළුවද? ජාතිය නාමෙන් රවටන අරුමය
පාවෙනවිට උඹටත් එය දැනුනද? එකම රටක් තුල වෙනසක පුදුමය

සිහිනයට අත්වැලක්...

ඒ පොඩි සිත්වල දිරිය වැඩෙන්නට
සිතේ ඇඳෙන හීනය වෙත යන්නට
හෙට දින බිහිවන ලොව ජයගන්නට
හැකිවෙද උපකාරය ලැබ දෙන්නට

මහනුවර උඩුමුල්ල ගම්මානයේ දරුවන් 29 දෙනෙකුට පොත් සහ පාසල් උපකරන ලබා දීමේ කටයුත්තට සහය වීමට කැමති නම් නාලක දිසානායකට දන්වන්න...